Laugardaginn 22. nóvember 2025 komu félagar í FÁT saman til að skoða sýninguna „Augliti til auglitis“ í Listasafni Sigurjóns Ólafssonar að Laugarnestanga 70, Reykjavík. Um þessar mundir stendur yfir sýning á nokkrum þeirra fjölmörgu portretta sem Sigurjón gerði á langri og farsælli starfsævi sinni. Sigurjón Ólafsson var án efa einn fremsti og næmnasti portrettlistamaður sem Íslendingar hafa átt, og vann hann jafnhliða að abstrakt- og raunsæisverkum.

Birgitta Spur, ekkja Sigurjóns, tók vel á móti okkur og sagði frá sögu safnsins og verkum listamannsins. Það var einstaklega fróðlegt og upplýsandi að fá að kynnast safninu og portrettverkum sýningarinnar beint frá Birgittu, sem þekkir verk og anda eiginmannsins af einstökum skilningi. Hún miðlaði einnig skemmtilegum sögum og atvikum tengdum listsköpun Sigurjóns, sem gerði heimsóknina bæði fræðandi og ánægjulega.

Að lokinni skoðunarferð nutu félagar kaffi og meðlætis í kaffistofu safnsins ásamt Birgittu sem hélt áfram að fræða okkur um safnið. Kaffistofan er ekki síður einstök fyrir mikið og fallegt útsýni  yfir náttúruna í kring og þar vorum við jafnframt stödd í sjálfri vinnustofu listamannsins.

Birgitta er skarpskyggn, áræðin og afar fróð, auk þess sem hún hefur víðtæka menntun í listum og sögu. Hún stundaði nám í höggmyndalist við Listaskólann í Kaupmannahöfn hjá E. Utzon-Frank og Johannes C. Bjerg. Auk þess lauk hún stúdentsprófi frá Menntaskólanum við Hamrahlíð og er með BA-próf í dönsku og íslensku frá Háskóla Íslands. Þá nam hún einnig listasögu bæði við Háskóla Íslands og Kaupmannahafnarháskóla á árunum 1985–86.

Listasafn Sigurjóns Ólafssonar varðveitir höggmyndir og teikningar eftir Sigurjón Ólafsson myndhöggvara, auk ýmissa heimilda um listamanninn sjálfan. Safnið gegnir jafnframt lykilhlutverki sem miðstöð rannsókna á list hans. Það var stofnað árið 1984 af Birgittu Spur, ekkju listamannsins, og var rekið sem sjálfseignarstofnun til ársins 2012, þegar það var afhent Íslenska ríkinu og varð hluti af Listasafni Íslands. Frá 1. desember 2021 hefur safnið verið rekið af rekstrarfélaginu Grímu ehf., undir stjórn aðstandenda Sigurjóns Ólafssonar.

Það er óhætt að mæla með heimsókn í Listasafn Sigurjóns Ólafssonar á Laugarnestanga. Sýningin er einstök í alla staði og safnið sannkölluð menningarperla.   Listasafn Sigurjóns Ólafssonar.