Félag áhugafólks um tréskurð á þrítugsafmæli 2026 og hefur samþykkt að fagna tímamótunum með sýningu sem umtalsvert meira yrði lagt í en gerist og gengur á hefðbundnum vorsýningum félagsins. Til að mynda yrðu tveir fyrrverandi heiðurslistamenn Kópavogs, báðir listamenn í tré og stein, kynntir sérstaklega og verk þeirra: Wilhelm Beckmann, fyrsti heiðurslistamaður Kópavogs, 1954, og Jón Adolf Steinólfsson, heiðurslistamaður 2015.

​

Stjórn Stofnunar Wilhelms Beckmanns samþykkti 2024 að styðja sýningarhaldið og taka þátt í tímamótunum í minningu Beckmanns. Hvergi ætti sýning sem tengist Wilhelm Beckmann betur heima en í safnaðarheimilinu Borgum. Utan dyra þar blasir við Kona, eina myndverkið úr steini sem Beckmann gerði á Íslandi, í anddyrinu er altaristafla eftir Beckmann frá 1954 og í Fundarherbergi eru munir eftir Beckmann eða tengdir fjölskyldu hans.

Skemmst er frá að segja að sóknarprestur og formaður sóknarnefndar tóku erindi gestanna þriggja afar vel. Niðurstaðan er sú að afmælissýning FÁT verður í safnaðarheimilinu Borgum laugardaginn 25. og sunnudaginn 26. apríl 2026.

Í óformlegu framhaldskrunki Víðis, Jóns Adolfs og Atla Rúnars á bílastæðinu að eiginlegum fundi loknum voru viðraðar ýmsar hugmyndir, meðal annars að opna sýninguna með dálítilli viðhöfn laugardaginn 25. apríl kl. 11 og hafa opið báða daga frá kl. 11 til 17.

FÁT fær allan samkomusalinn til umráða og anddyrið líka. Þarna er hljóðkerfi, sýningartjald og tilheyrandi tæki til að sýna ljósmyndir og kvikmyndir. Þarna eru með öðrum orðum aðstæður og möguleikar til að búa til magnaða afmælissýningu og vandaðan viðburð sem hæfir tilefninu.

Ástæða er til þess að þakka sóknarpresti og formanni sóknarnefndar fyrir afar jákvæð viðbrögð, mikinn áhuga og hvatningu.